بەرێز بێ یادی شێرکۆ بێکەس شاعیری گەورەی سەردەمی ژانەگەورەکانی کورد،

 

ڕۆژی یەکشەممە، شێرکۆ بێکەس شاعیری گەورەی کورد و دەنگی ڕەسای بزووتنەوی ئازادیخوازی کورد، لە ئەنجامی نەخۆشیدا، لە نەخۆشخانەیەکی شاری ستۆکهۆڵم ماڵاوایی لە ژیان کرد. ئەوە بۆ بزووتنەوەی ئازادیخوازی کوردستان و بۆ کۆمەڵەش کە کاک شێرکۆ دۆستی ڕاستی و وەفاداری بوو، کۆستێکی گەورەیە.

شێرکۆ بێکەس، شاعیری گەورەی سەردەمی ژانە گەورەکانی کورد بوو. کیمیابارانی هەڵەبجە، ئەنفالی خەڵکی کوردستان، کۆڕەوی سەدان هەزار کەس لە خەڵکی کوردستان، سووتاندنی گوندەکان و چوڵکردنی شارەکان و، مردن aو تێداچوونی هەزاران منداڵ و نەخۆش لە کۆڕەودا و، گوللەبارانکردنی لاوان و مێرمنداڵان لە شەقامی شارەکان و سووتانی مەزرا و خەلە و خەرمانی جووتیارانی کورد، ڕووداوە تاڵەکانی سەردەمی ژیانی شێرکۆ بێکەس بوون. لەو ڕۆژە دژوارانەدا، شێرکۆ بێکەس و شیعری شێرکۆ بێکەس، دەنگی ورەبەخش و ئومێدبەخشی وەستانەوەی کورد بوون بە ڕووی ستەم و داگیرکاریدا.

لە شەڕی بەرەنگاربوونەوەی داگیرکاریدا و لە ڕۆژانی ڕاپەڕینی شکۆداری خەڵکی کوردستاندا، شێرکۆ بێکەس و شیعری شێرکۆ بێکەس، لە سەنگەرەکانی شاخ و شەقامەکاندا، هەڵمەتیان دەبرد، بریندار دەبوون، شەهید دەبوون و، دەژیانەوە و دەرسی ئومێد و خۆڕاگرییان دەدا.

بە درێژایی ئەو ساڵانە، شیعری شێرکۆ بێکەس لە بەرەی پێشکەوتن و ئازادیخوازیدا لە دژی کۆنەپەرەستی وەستا، پشتیوانیی لە بەرەی پێشڕەوی کۆمەڵگەی کوردی کرد، داکۆکیی لە مافی ژنان و مناڵان کرد و، هەوڵیدا هاواری بێبەشان و ژێردەستان بەرزتر کاتەوە. شیعری ئەو ببوە هاورازی دڵە بچکۆلەکەی حەمەی بۆیاخچیش.

کاک شێرکۆ پشتیوانێکی دڵسۆز و دۆستێکی وەفاداری کوردی ڕۆژهەڵات و کۆمەلە بوو. لە ڕۆژانی خەباتی سەختی شاخدا، شێرکۆ بێکەس و هەگبەی شیعرەکانی، گەرما و ئاوەدانیی “دەواڕە شڕەکان”ی هەواری پێشمەرگەی کۆمەلە بوون. شیعری شێرکۆ بێکەس ببووە خوێنگری ”بەیان“ی کچە پێشمەرگەی کۆمەڵە، ببووە هاوڕێی قەڵەمە سوورەکەی دوکتور جەعفەر و، شنەی لاوێنەری یادی کاک فوئاد و پێنج براکەی شەهیدی ”مستەفاسوڵتانی“ لە مەزاری ”تاڵەسوار“. شێرکۆ بێکەس خەباتی ئازادیخوازانەی بەرینایی کوردستانی کردبووە هەوێنی شیعر و هەڵوێستی مرۆڤدۆستانەی. ئەو بوو کە بوێرانە بوو بە داشداری شیرینی عەلەمهویی، ئیحسانی فەتاحیان و فەرزادی کەمانگەر و ناوی کۆماری سێدارەی نایە سەر جمهوری ئیسلامی.

ماڵاواییکردنی کاک شێرکۆ بۆ بزووتنەوەی ئازادیخوازی کورد، کۆستێکی بەژان بوو. بەم بۆنەیەوە سەرەخۆشی لە خەڵکی ئازادیخوازی کوردستان، بنەماڵەی بەڕێزی و لە ریزەکانی پێسکەونخوازیی دەکەین.

 

کومیتەی ناوەندیی کۆمەڵەی زەحمەتکێشانی کوردستان

یەکشەممە ٤/٨/ ٢٠١٣ زایینی یان ١٣ گەلاوێژی ١٣٩٢