خەڵکی تێکۆشەری کوردستان، خوشکان و برایان، دۆستان و ئازیزان!

لە لایەن خۆم و ھەموو ریزەکانی کۆمەڵەی زەحمەتکێشانی کوردستانەوە پڕ بە دڵ دەڵێم: نەورۆزتان پیرۆز، سەرتان سڵامەت و ژیانتان بێ ناخۆشی بێ.

نەورۆزی ئەوساڵ لە کاتێکدا جێژن دەگرین کە کۆماری ئیسلامی توشی گرفتی سیاسی و ئابوری بێ چارەسەر ھاتووە و عومری نگریسی بەرەو کۆتاییە. لە کوردستانیش وا پتر لە سالێکیشە ناوەندی ھاوکاریی حیزبە سیاسیەکان دەست بە کار بووە و ھەموومان لامانوایە کە ئەو ھاوپەیمانییە پێویستە بەرفراوان بکرێ و دەیکەین. ھەموو ھەوڵی خۆمان لەو نەورۆزە بەولاوە دەخەینە گەڕ تا ئەو ناوەندە پێشوەچونی گەورە بەخۆوە ببینێ و بتوانین یەکگرتووییەکی پتەو و شیاوی بزوتنەوە و خەباتی بوێرانەی ئێوە لە کوردستانی ناو ئێران، بنیاد بنێین.


بۆ جارێکی دیکەش لە ساڵی ڕابردودا سەلمێندرا کە خەباتێکی مەدەنی بێ کوژانەوە لە کوردستانی ڕۆژھەڵات بە ھیمەت و کارامەیی چالاکوانانی مەدەنی لە ئارا دایەو، ھەموان پێی دڵخۆشین. لە ساڵی داھاتوودا دڵنیاین کوانوی ئەو بزوتنەوەیە گەرموگوڕ و بە تینتر دەبێ و بۆ ئەو مەبەستە دەبێ ھەموومان لە پیر و جوانەوە کاری جیددی بۆ بکەین.


ساڵی پار دەکرێ بڵێین ساڵی ھاودەنگی ئێوەی جەماوەی گەل و حیزبە سیاسیەکان بوو. توانیمان دژ بە کۆماری ئیسلامی گەورەترین و جەماوەریترین نمایش لە مانگرتنێکی سەراسەریدا سەرکەوتوانە بەڕێوە بەرین. ھیوادارم و ھەوڵ دەدەین ساڵی داھاتوو ببێتە ساڵی یەکگرتوویی خەڵک و ھێزە سیاسیەکانی، بیکەینە ساڵی کار کردن لە پێناو ئامانج و ئاواتی یەکریزی ئێوەی خەڵکی کوردستاندا.


ئەو رژیمە بە ھاتنە سەرکاری ھەوەڵین نەورۆزی کوردستانی خەڵتانی خوێن کرد، دڵنیام لەو نەورۆزەوە پڕۆسەی کەنەفتی و نەمانی ئەو نیزامە دەست پێدەکات. بۆ ئێمە گرینگترین چەک یەکگرتوییە چ لە نێوان کۆمەڵەدا و چ لەگەڵ حیزبەکانی دیکە. کۆمەڵەی زەحمەتکێشانی کوردستان تێدەکۆشی ببێتە بەشێک لە ھەوێنی ئەو یەکریزییە. ھەروەھا ئێمە بەڵێن نوێ دەکەینەوە کە وەک ھەمیشە سەنگەری پارێزگاری لە چینی چەوساوەی کوردستان بین و بۆ بیری ئازاد و پێشکەوتوو کار بکەین.


خوشکان و برایان ! بەھاری خۆشی لە ڕیدایە و تێکۆشان و ڕەنجی ئێوە و ڕۆڵەکانتان بێ بەھرە نەبووە و نابێ. سەختی ژیان و سفرەی بێ ڕەونەقتان دەبینین و ھەستی پێدەکەین، لە ھەمان کاتدا ھەمیشە دەڵێم سەربەرزم بەوەی کە یەکێکم لەو خەڵکە خۆڕاگرە، شانازیتان پێوە دەکەین.


پێویستە لەو نەورۆزەدا سڵاو بنێرین بۆ بنەماڵەی ھەموو گیانبازانی ڕێگای ئازادی گەل و کوردستان، دەستی ھەموو دایک و باوکانی گیانبەختکردوان ماچ دەکەم، بەڵێنیان پێدەدەین ڕێبازی ڕۆڵەکانیان بێ ڕێبوار ناھێڵینەوە و ئامانجیان بەرز و زیندوو ڕادەگرین.


سڵاو لە چالاکانی مەدەنی و سیاسی، لە تێکۆشەرانی ناو بەند و سڵاو لە ھەموو ئەوانەی لەو شۆڕشەدا بە گیانبازی بەشێک لە جەستەیان لە دەست داوە.


سڵاو لە ھەموو ئەو پێشمەرگە دێرینانەی وا سەنگەری پێشمەرگایەتی و گیانبازییان ئاوەدان کردەوە. نەورۆزیان پیرۆز بێ.
باوەشێک خۆشەویستی و خرمانێک ئاوات بۆ ئێوە. دڵتان ئاوەدان، خەم نەمێنێ لە ناوتان و ھیواتان گەشاوە بێ.