ڕۆژی هەینی هەژدەی مانگی یونی ژمارەیەک لە هاوڕێیان و ئەندامانی کۆمەڵەی زەحمەتکێشانی کوردستان لە بەردەم باڵوێزخانەی کۆماری سێدارە لە ستوکهۆڵم کۆ بوونەوە و لە خۆپیشاندانی بەرینی لایەنە جۆراوجۆرەکانی ئۆپۆزیسیۆنی دژ بە کۆماری ئیسلامی بۆ بەرپەرچدانەوە و دەڕبڕینی دژایەتی و ناڕەزایەتی بەرامبەر بە شانۆی هەڵبژاردنەکانی ناوخۆی ئێران بەشدارییان کرد. لەو خۆپیشاندانەدا زۆر لایەن و ڕێکخراو وەکوو هێزە چەپەکان بریتی لە چریک فەدایی، حککا، حکا، کۆمەڵەی سازمانی کوردستانی حزبی کۆمۆنیستی ئێران وە هەروەها کۆمەڵەی شۆڕشگێری زەحمەتکێشانی ئێران و سازمانی موجاهدین و ڕەوتی سەڵتەنەت خۆاز بەشدار بوون و ڕێژەی خۆپیشاندەران لە چەند سەد کەس تێپەڕ دەبوو. دروشمەکان بە گشتی دژ بە دەسەڵاتی ئیسلامی بوون بەڵام سەڵتەنەت تەڵەبەکان بە دروشمی “جاوید شاە” هاتنە پێشەوە کە لەگەڵ ناڕەزایەتی زۆربەی لایەنەکانی دیکە بەرەو ڕوو بوون و هەندێک ئاڵۆزی لە ڕەوتی خۆپیشاندانەکەدا ڕووی دا. زۆرێک لەو کەسانەی وا بەشداری خۆپیشاندانەکە بوون بە هۆی ئەوەی لە دەورانی پەهلەوی وەکوو زیندانی سیاسی، تامی تاڵی دیکتاتۆریی ئەو دەورەیان چێشتبوو یان وەکوو بنەماڵە و هاوڕێی ئەو کەسانەی وا لە دەورانی دەسەڵاتداری مەحەمەد ڕەزای پەهلەویدا ئێعدام کرابوون، بە دروستی دژ بەو دروشمە کاردانەوەیان هەبوو. کۆبوونەوەکە هەر لە پێش نیوەڕوە تاکوو کاتژمێر چواری دوای نیوەڕۆ درێژەی هەبوو. لە لایەکی دیکەشەوە ئەوەی کە بەدی دەکرا ڕێژەی زۆر نزمی بەشداری خەڵکانی لایەنگری کۆماری ئیسلامی بوو کە بۆ دەنگدان هاتبوون بۆ باڵوێزخانەی کۆماری ئیسلامی. نووسەری ئەم ڕاپۆڕتە لە ماوەی چەند کاتژمێردا کە لە بەردەم باڵوێزخانەدا بەشداری کۆبوونەوەکە بوو، کەمتر لە بیست کەسی دی کە بێن و دەنگ بدەن. ئەو کەسانەش کە دەهاتن بۆ دەنگدان، لەگەڵ دروشم و کاردانەوەی توندی هێزەکانی ئۆپۆزیسیۆن بەرەو ڕوو دەبوون. خاڵێکی دیکە کە سەرنج ڕاکێش بوو هاتنی هەواڵنێری تلوێزیۆنی ئێران ئینترنشناڵ بوو. هەواڵنێری ئێران ئینترنشناڵ بە هیچ شێوەیەک لەگەڵ نوێنەرانی هێزە چەپەکانی بەشدار لەو خۆپیشاندانەدا وتوووێژی نەکرد و تەنانەت لە گرتە ویدیۆییەکانیشدا ئەو بڕگانە نیشان درا کە هێزی چەپی تێدا نەبوو.کۆمەڵەی زەحمەتکێشانی کوردستان ( کومیتەی سوێید )
