لە چوار چێوە بەردەوامی پەیوەندی و هاوکاری نێوان ڕێکخراو و حیزبە سیاسیەکانی کوردستان، شاندێکی ئەنجۆمەنی هاوئاهەنگی کۆنفدراسیۆنی کوردانی ئورووپا بە نوێنەرایەتی فائیزە یونس، حسێن باخچی، ڕووناک عەزیز، ئەردەڵان عەبدووڵڵاهی و عومەر محەممەد ڕۆژی یەکشەممە ١٢ی خەزەڵوەری ١٤٠٤ی هەتاوی (٣ی نۆڤامبری ٢٠٢٥ی زایینی)، سەردانی پێوەندییە سیاسییەکانی کۆمەڵەی شۆڕشگێڕی زەحمەتکێشانی کوردستانی ئێران لە هەولێریان کرد.
تەوەری سەرەکی دانیشتنەکە پێداگری و تیشک خستنە سەر هاوئاهەنگی زیاتر لە نێوان ڕێکخراو کوردستانیەکان لە دیاسپۆرا و ئەحزابی کوردستانی بوو کە پێویستە کوردانی ناوخۆ و دیاسپۆرا بە شێوەیەکی هاودەنگ لەسەر هێڵی گشتی نەتەوەیی کار و چالاکیەکانیان بەرنە پێشەوە.
لە ئەم کۆبوونەوەیەدا کە لە لایەن شاندی کۆمەڵەوە بە سەر پەرەشتی هاوڕێ عومەری ئیلخانی زادە (جێگری سکرتێری گشتی) و یاوەری هاوڕێیان کاکۆ عەلیار (ئەندامی دەفتەری سیاسی)، عەلی ڕەنجبەری (بەرپرسی پەیوەندییە کوردستانیەکان لە هەولێر) و هەژار وەلیزادە (جێگری پەیوەندییەکانی کۆمەڵە لە هەولێر) پێشوازیان لێکرا، جەخت لەسەر ئەوەی کرایەوە کە هەرهاودەنگی و چالاکی سیاسی دەبێت لەسەر بنەمای دیموکراسی، شەفافیەت و ڕێزگرتن لە سەربەخۆیی یەکتر بنیات بنرێت، نە لەسەر هەژموون و ناوەندگەرایی.
لە کۆتاییدا جەخت لەسەر ئەوە کراویەوە کە بۆ بەردەوامی پەیوەندی و دیالۆگ نێوان لایەنە سیاسیەکانی هەر چوار بەشی کوردستان، پێویستی بە هاوکاریی و پشتیوانی زیاتری نێوان کوردانی تاراوگە و ناوخۆ هەیە، بۆ ئەوەی بەرژەوەندیی نەتەوەی کورد بە شێوەیەکی گشتی و یەکگرتوو پارێزراوبێت.
کۆمەڵەی شۆڕشگێڕی زەحمەتکێشانی کوردستانی ئێران
١٢ی خەزەڵوەری ١٤٠٤ی هەتاوی
٣ی نۆڤامبری ٢٠٢٥ی زایینی
