پەیامی ناوەندی هاوكاریی حیزبەكانی كوردستانی ئێران بەبۆنەی دووهەمین ساڵیادی تاوانەكانی 17ی خەرمانان

خەڵكی ئازادیخوازی كوردستان!
حیزب‌و لایەنە سیاسیییەكانی كوردستان‌و ئێران!
دوو ساڵ لەوەپێش و له وه‌ها ڕۆژێکدا سوپای پاسدارانی کۆماری ئیسلامی ئێران بنکە و بارەگاکانی حیزبی دێموکڕاتی کوردستانیان له قه‌ڵای دێموکڕات کرده ئامانجی مووشه‌که بالیستیکه‌کانی خۆی. له ئاکامی ئه‌و هێرشه‌ سامناکەدا وێڕای برینداربوونی ده‌یان که‌س له تێکۆشه‌رانی حیزبی دێموکڕات که له‌نێوانیاندا ژماره‌یه‌ک ژن و منداڵ ده‌بینران، چواردە ‌که‌س له ئه‌ندامانی ڕێبه‌رایه‌تی و کادر و پێشمه‌رگه‌کانی حیزبی دێموکڕاتی کوردستان شه‌هید بوون. هەرلەئاکامی ئه‌و مووشه‌کبارانه‌دا دوو مامۆستای فێرگەی حیزبی دێموکراتی کوردستانی ئیرانیش شه‌هید بوون. هەر لەو رۆژەدا سێ زیندانیی سیاسی كۆمەڵە بە ناوەكانی “رامین حوسەین پەناهی، لوقمان مورادی ‌و زانیار مورادی” لەلایەن جەلادەكانی كۆماری ئیسلامی لە زیندان لەسێدارەدران.
كردەوەی تیرۆریستی‌و سەركوتی بیرجیاوازان لە سیاسەتی كۆماری ئیسلامیدا بابەتێكی نوێ‌و نامۆ نیە‌ و، لەماوەی 4 دەیەی دەسەڵاتی رەشی خۆی بە سەر ئێران‌و كوردستان یەكێك لە بنەما سەرەكییەكانی پاراستن‌و شەرعییەت پێدان بە دەسەڵاتی رژیم بووە، هێرشی تیرۆریستی بۆ سەر بنكەكانی حیزبی دێموكرات‌ و لەسێدارەدانی سێ زیندانی سیاسی كورد لە رۆژێكدا لەلایەن كۆماری ئیسلامییەوە هەر بە ئاراستەی ئەو سیاسەتە نامرۆڤانەیە‌و بە ئامانجی چاوترساندنی خەڵكی كوردستان‌و نمایشی هێزی سەربازیی سوپای تیرۆریستی پاسداران ئەنجامدرا، بەڵام ئەوەی بەرپرسانی رژیم چاوەڕوانیان نەدەكرد، دەنگی بەرینی ناڕەزایی خەڵكی لە كورستان بوو بەرامبەر بەم تاوانە.
بەدوای ئەو تاوانە تیرۆریستییە، لەسەر داوای ناوەندی هاوكاریی حیزبەكانی كوردستانی ئێران رۆژی 21ی خەرمانانی 1397، مانگرتنێكی سەرتاسەری لە رۆژهەڵاتی كوردستان راگەیەندرا‌ و خەڵكی ئازادیخوازی كوردستان بەدەم داوای حیزبەكانی خۆیانەوە هاتن‌ و بۆ جارێكی دیكە تاوانەكانی كۆماری ئیسلامییان مەحكوم كرد.
ناوەندی هاوكاریی حیزبەكانی كوردستانی ئێران لە دووهەمین ساڵیادی تاوانی 17ی خەرمانان دا سڵاو دەنێرێت بۆ گیانی پاكی گیانبەختكردوانی ئەو رۆژە و هاوخەمی خۆی لەگەڵ بنەماڵە‌و هاوسەنگەرانی ئەو شەهیدانە دووپات دەكاتەوە. بۆ جارێكی دیكەش ئەو تاوانەی كۆماری ئیسلامی مەحكوم دەكەین‌و پێزانینی خۆمان ئاراستەی خەڵكی وشیار‌ و خەباتكاری كوردستانی رۆژهەڵات دەكەین كە هەمیشە خاوەندارێتی رۆڵەكانی خۆیان كردوە‌ و دژی داگیركاریی‌ و سیاسەتەكانی كۆماری ئیسلامی تێكۆشاون‌ و قوربانییان داوە.
جارێكی دیكە یادی شەهیدانی رۆژی 17ی خەرمانانی 1397‌و سەرجەم گیانبەختكردوانی بزووتنەوەی حەقخوازانەی خەڵكی كوردستان بەرز رادەگرین‌ و پەیمان تازە دەكەینەوە كە درێژە دەری رێگای پڕ لەشانازییان دەبین.
ناوەندیی هاوكاریی حیزبەكانی كوردستانی ئێران
16ی خەرمانانی 1399ی هەتاوی
6ی سێپتامبری 2020ی زایینی

لە تویتێرەوە