کۆمەڵانی تێکۆشەر و ئازادیخوازی کوردستان!
هەڵسووراوان و چالاکانی سیاسی و مەدەنی!
کۆماری ئیسلامی جارێکی دیکە داخوازییە مەدەنی و رەواکانی کۆمەڵانی خەڵکی بۆ رزگاربون له هەژاری و نەداری و بۆ گەیشتن به ژیانێکی باشتر و ئینسانی تر، لەوپەڕی بێ رەحمی و جەنایت و دڕەندەیی خەڵتانی خوێن کرد، که هەر له سەرتای ناڕەزایەتیەکاندا سەدان کوژراو و برینداری لێکەوتەوە. له کوردستان وەک چل ساڵی ڕابردوو ڕادەی جەنایت و کوشتاری رژیم ئەمجارەش هەموو سنوورێکی بەزاند و ترس و نیگەرانی رژیمی له هاتنە مەیدانی خەڵکی کوردستان جارێکی تر به هەمووان سەلماند.
شێوازی بڕیاری رژیم و لێدوانەکانی خامنەیی دەریدەخەن کە دەسەڵاتدارانی ئێران پێشبینی سەرھەڵدانی توڕەیی خەڵکیان کردوە و ھێزە سەرکوتکەرەکانیشیان ساز کردووە بۆ سەرکوت و کوشتار تا بەم شێوازە ترس و تۆقاندن پەرە پێبدەن. ئەوەی جێگای سەرنجە، یەکگرتوویی و دەربڕینی ڕقی پەنگخواردووی جەماوەر لە شەقامی ھەموو شارەکانی ئێران بە ڕوونی ھاتە سەر شانۆ. لەو سێ ڕۆژەدا دەرکەوت کە خەڵک و ئەو دەسەڵاتە بە ڕادەیەکی بێ وێنە دژ بە یەکدی دەجوڵێنەوە و نەفرەت و ناڕەزایی گەڵانی ئێران لە کۆماری ئیسلامی گەیشتۆتە ئەو پەڕی خۆی و، تان وپۆی ئەو دەسەڵاتە گەندەڵ و ڕزیوە لە ھەڵوەرین دایە.
ئێمە وێڕای پشتگیری تەواو لەو شەپولی ناڕەزایەتییە، جەخت لەو خاڵانەی خوارەوە دەکەینەوە
١.ئەم ڕژیمە بە تەمایە هەتا ئەو ناڕەزایەتیانە بە تەواوی ڕێکخراو و مونەزەم نەبوون، بە ھەموو شێوازێک توند وتیژی بنوێنێ و خەڵک چاوترسێن بکات. بۆیە پێویستە چالاکوانان و تێکۆشەران بە ژیری ئەو سیاسەت و پیلانە پوجەڵ بکەنەوە، بە تایبەتی لە کوردستان کە ئەزموونی خەباتی مەدەنی و ڕێکخراو بوون تێیدا زۆرە، دەتوانین بە وشیاری ئەو پیلانە پوچەڵ بکەینەوە.
٢.لە ھەموو ڕێکخستنەکان و چالاکوانان لە دەرەوەی وڵات دەخوازین کە بە ھەموو توانی خۆیان بکەونە گەڕ و بە ھاوئاھەنگی لەگەڵ لایەنەکانی دیکەی کورد پشتیوانی لە ناڕەزایەتیەکانی ناوەوە بکەن و خوازیاری ئازادی گیراوەکان و کۆتایی ھێنان بە کوشت وبڕ و میلیتاریزم بن.
٣.حەول بدەین ناوەندی ھاوکاریی حیزبەکانی کوردستانی ئێران یەکدەنگ ئاکسیۆنی ھاوبەش بە ھاوکاری دیکەی لایەنە سیاسیەکان ، بانگەواز بکەین و ھەموو ڕێکخراو و ناوەندە نێو نەتەوەییەکان بۆ گۆشار خستنە سەر کۆماری ئیسلامی بێنینە سەر خەت.
ھەروەھا لەگەڵ ڕێکخراو و ھێزە سیاسیەکانی ئۆپۆزیسیۆنی ئێرانی له‌م پێوه‌ندییه‌دا ھاوکاریی و ھاوئاھەنگیمان پەرە پێبدەین.
٤.داوا دەکەین چالاکوانان و ھێزە سیاسیەکانی پارچەکانی دیکەی کوردستان بە ھەموو توانیانەوە چ لە کوردستان و چ لە دەرەوەی وڵات خۆپیشاندان بۆ پشتیوانی لە ڕۆژھەڵاتی کوردستان بخەنە ڕۆژەڤ.
٥.بە بڕوای ئێمە یەکدەنگیی ھێزە سیاسیەکانی ڕۆژھەڵات مەرجی سەرەکی کارەکانی سەرووترە. بە تایبەتی لە ناوەوەی کوردستان ئەو یەکێتی و یەکریزییە گرنگی و مانای کردەیی ھەیە بۆ ھەر ھەنگاوێکی دیکەی دژ بە سەرکوت و دەسەڵات.
کۆمەڵەی زەحمەتکێشانی کوردستان لە دۆست و ئەندام و لایەنگرانی خۆی دەخوازێ کە چالاکانە بۆ بەڕێوەبردنی ئەو سیاسەتانە لە ھەر کوێ کە ھەن، دەست بە کار بن
.
هه‌یئه‌تی ئیجرایی کۆمەڵەی زەحمەتکێشانی کوردستان
١٨نوامبری ٢٠١٩ی زایینی
