بەداخ و کەسەرێکی زۆرەوە رۆژی پێنجشەممە ٦ی مانگی خەرمانان، هاوڕێ عەلی پەرویزی مامۆستای تێکۆشەر و شوڕشگێڕ، کادری لەمێژینەی کۆمەڵە و سیمای ناسراو و خۆشەویستی خەڵکی شاری سەقز لە کاتی گەڕانەوە لە شاخەوانی لەگەڵ کۆمەڵێک لە شاخەوانان و دۆستانی نزیکی خۆی، لە تەمەنی ٦٥ ساڵیدا دڵە گەورەکەی بۆ ھەمیشە لە لێدان کەوت.
کاک عەلی پەرویزی یەکێک لەو مامۆستا شۆڕشگێڕ و بەھەڵوێستانە بوو، کە ھەر لە سەرەتای دەسپێکی وانە وتنەوە لەگەڵ سیستەمی پاشایەتی کەوتە دژایەتی و بەم ھۆیەشەوە لە لایەن ساواک دەستگیر کرا و کەوتە ژێر ئەشکەنجە و گوشارەوە، بەڵام ئەم گوشار و کۆت و بەندە نەیتوانی ورەی خەباتکارانەی خەوشدار بکات و پاش سەرکەوتنی شۆڕشی گەلانی ئێران بە دۆستایەتی لەگەڵ کۆڕ و کۆمەڵی مامۆستایانی شۆڕشگێڕی شاری سەقز کە کاک یەحیا خاتوونی لە بەرچاوترین کەسایەتیەکانی نێو ئەو کۆڕ و کۆمەڵانە بوو، لە ھێزە چەپ و سۆسیالیستەکان و بەتایبەتی کۆمەڵە نزیک بووەوە و بۆیەش دواتر لە لایەن رژیمی کۆنەپەرستی کۆماری ئیسلامییەوە وەکوو سەدان مامۆستای شۆڕشگێڕی دیکەی کوردستان، وانە وتنەوەی لێ قەدەخە کرا.
هاوڕێ عەلی له پاش ساڵی ٢٠٠٠ەوە پەیوەندی تەشکیلاتی له گەڵ کۆمەڵە چڕوپڕتر کردەوە که تا دوا ساتەکانی ژیانی بەردەوام بوو. هاوڕێ عەلی له شاری سەقز جێ متمانەی خەڵک و لاوانی شۆرشگێڕ بوو، پرسیان پێدەکرد و له ئەزمونەکانی کەڵکیان وەردەگرت. له کاتی جموجوڵی جەماوەریی لەوانە له کاتی هەستانی شاری سەقز له دژی جینایەتی کوشتنی شوانەی سەید قادر، دەوری گرینگی گێرا.
بێگومان لەدەستدانی کەسایەتیەکی خۆشەویست و خۆنەویست، شۆڕشگێڕی نوێخواز و کۆڵنەدەری وەکوو کاک عەلی پەرویزی خەسارێکی بەرچاو و گەورەیە بۆ کۆمەڵە و بزووتنەوەی ڕزگاریخوازی کوردستان. بەم بۆنەوە لە لایەن ھەموو ئەندامانی کۆمیتەی ناوەندیی و سەرجەم ریزەکانی کۆمەڵەی زەحمەتکێشانی کوردستان، پڕ بەدڵ پرسە و سەرەخۆشی خۆمان ئاراستەی هاوڕێ شەھلا و کاک حەمە پەرویزی، ژاڵە شیرزادی خانمی هاوسەری، ژینۆ و پویا پەرویزی و سەرجەم بنەماڵەی و خەڵکی شاری سەقز دەکەین.
بەرز و بەڕێز بێ یاد و ناوی ھاوڕێ عەلی پەرویزی

کومیتەی ناوەندی کۆمەڵەی زەحمەتکێشانی کوردستان

٧ی خەرمانانی ١٣٩٩ی ھەتاویی
٢٨ی ئاگۆستی ٢٠٢٠ی زایینی