شکۆدار بێ ئەوەڵی مانگی مەی،رۆژی جیهانیی کرێکار

لە مێژووی خەبات وململانێ چینایەتییەکان و،لە خەبات بۆ ئازادی و دادپەروەری و،تێکۆشان لەدژی نابەرابەری وچەوساندنەوەدا،ئەوەڵی مانگی مەی وبزووتنەوە جیهانییەکانی چینی کرێکار بووەتە خاوەن پێگەیەکی بەرز وپرشکۆ و، سەنگ وقورساییەکی تایبەت و گرینگی هەیە.لە ماوەی زیاتر لە سەدوسی(١٣٠)ی ساڵی رابردوودا ئەوەڵی مانگی مەی بووەتە سیمبولی هاوپشتی و هەوێنی خرۆشی بەرینی چەوساوەکان وهێما ورەمزی یەکێتی ویەکریزیی هەموو هێز ولایەنە سۆسیالیست و دادپەروەر وئازادیخوازەکانی جیهان.

هەر لە ١٧٠ ساڵ لەوەپێشەوە و لەگەڵ بڵاوبوونەوەی مانیفێست و لەو کاتەوە کە ریزی یەکگرتوو ولەپساننەهاتووی  کرێکاران وزەحمەتکێشان وچەوساوەکان لە جەرگەی شۆرش وراپەرینە بەربڵاوەکانی ئوروپادا و لە گۆرەپانی خەباتە کۆمەڵایەتییەکاندا وەک هێزێکی بەرچاو و شوێندانەر وگرینگ سەریانهەڵدا و، هەتا کۆمۆنی پاریس وپێکهاتنی ئەنترناسیۆناڵ وشۆرشی مەزنی ئۆکتۆبر لە سەرەتای سەدەی بیستەمدا و بە هەزاران شۆرش و راپەرین، مانگرتن وخۆپیشاندان و خەبات وتێکۆشانی بەرین لە ئاستی هەموو جیهاندا،مرۆڤایەتی تینووی گۆرانکاری و دژبەری سەرکوت وستەم وچەوسانەوە و بە تایبەت کریکاران لە پێناو دامەزراندنی دنیایەکی ئازاد وبەرابەر و بێ چەوساوەنە،دنیایەکی شیاوی ئینسان، رێگایەکی دوورودرێژ و پراوپر لە فیداکاری و لەخۆبوردوویی و پر لە خەباتی یەکگرتوویانەیان بڕیوە.

ئەمرۆ ئێمە لەکاتێکدا کە خۆمان بۆ پێشوازیی ئەوەڵی مانگی مەی ئامادە دەکەین، خەبات و تێکۆشان لە پێناو دادپەروەری و نەهێشتن و سڕینەوەی چەوسانەوە و ستەم وهەڵاواردن، زیاتر لە هەموو کاتێکیتر بووەتە پێویستییەکی جیهانی و بووەتە پلاتفۆرمی خەباتی بێبەشان وچەوساوەکان وزۆرینەی کۆمەڵگای مرۆڤایەتی.

سیستمی سەرمایەداری کە خوڵقینەری دۆخی چەوسێنەری جیهانییە، ئەم نیزامە ناعادڵانەیە رادەی چەوساندنەوە، نابەرابەری ،هەژاری ، ئاوارەیی ودەربەدرەی و کۆچکردنی گەیاندووەتە بەرزترین و نامرۆڤانەترین ئاست لە مێژووی مرۆڤایەتیدا و لە کاتێکدا کە کۆمەڵگای مرۆڤایەتی لە سایەی پێشکەوتنە بەرچاوە زانستییەکان و بە هۆی دەسکەوتە گەورە ودەگمەنەکانی بواری تێکنۆلۆژی ئیتر دابینکردنی ژیانێکی ئینسانی لە کۆمەڵگادا شیاوی دابینکردن ودەستەبەربوونە، کەچی دانیشتووانی گۆی زەوی لە پێناو چەوسانەوە و بەکۆیلەکردنی مۆدێرن دیلی تەماح وچاوچنۆکیی لەبن نەهاتووی ئەو نیزامەن. دەستبردن بۆ سازکردنی شەرگەلی بەوەکالەت لە لایەن زلهێزەجیهانییەکانەوە وەک شەرگەلی نەزۆر شاراوە لە پێناو تاڵان وبرۆی زیاتر بێ کۆتایە. تراژیدیای کۆچکردنە بە ملیۆنییەکان، لەسەرکار مانەوەی حکوومەتە تۆتالیترەکان کە لەراستیدا بە بێ پاڵپشتی زلهێزە جیهانییەکان توانانی راگرتنی دەسەڵاتەکانیان نییە،چوونەسەری خێرایی رەوتی چەوساندنەوە ونابەرابەری و نادادپەروەری کەم وێنە و،هەڵکشانی زیاتری مەودای نێوان هەژاری و سەروەت و سامان، رەوتێکە کە بە خێرایی و بەردەوام کۆمەڵگای مرۆڤایەتی بەرەو و هەڵدێری تێداچوون دەبا.

لە یەکساڵی رابردوودا دەسەڵاتدارانی ئەو نیزامە بۆ رووبەروو بوونەوە لەگەڵ  پەتای کرۆنا نەتەنیا کارنامەیەکی سپی وباشیان نییە، بەڵکوو هەمووان دیتیان کە لاوازی و دەستەوەستانی ئەو سیستمە کە لەراستیدا هەڵقووڵاوی چاوچنووکی و هەڵپەی کەڵەکەکردن و تاڵانی سەروەت وسامانە، چلۆن بێ کیفایەتی ئەو نیزامەی لە بەرێوەبردن و رێکخستنی کۆمەڵایەتیدا دەرخست. هەرچەند لە وڵاتانی ئوروپایی و لە ئامریکا سیستمی سەرمایەداری  نەیتوانیوە بەرامبەر بە دابینکردنی پێداویستییەکانی ژیانی رۆژانەیان خۆی لە بەرپرسیارەتییەکانی بدزێتەوە، بەڵام کارنامەیەکی رۆشنی نییە. لە ئوروپا وردە وردە کاریگەری ولێکەوتەکانی دۆخی تەشەنەی کرۆنا خەریکە دەردەکەون. بەهەزاران پیرو بەساڵاچوو بە هۆکار یان بە بیانووی بڵاوبوونەوەی کرۆنا کە گویا کەس نەبووە سەردانیان بکا، لە ماڵەکانیاندا لە برسان گیانیان لەدەست دا، هەرچەند لە ریزی قوربانییەکانی کرۆنا ناویان تۆمار کردن. لەو دۆخەدا بە ملیۆنان کەس لە سەرتاسەری جیهان چوونە ریزی بەرینی بێکارانەوە کە وەک هەمیشە لەو رەوتی بێکارکردنەشدا ژنان پشکی شێریان بەرکەوتووە. سەرهەڵدان و بڵاوبوونەوەی پەتای کرۆنا بە روونی دەریخست کە ئەو سیستمە هەتا چ رادەیەک لەرزۆک و لاوازە و قەیرانەکانی کە زادە وخۆڵقاوی خودی ئەو نیزامەن، هەرگیز کۆتاییان نایە.

خەبات و بەربەرەکانێی لە پێناو دادپەروەری وسوسیالیزم و ئازادی لە ئاستی هەموو جیهاندا لە لایەکەوە و لە لایەکیتری ئەم ململانێیە، بەردەوامبوونی سەرکوتگەری ودیکتاتۆری، شەر و ئاوارەیی و نابەرابەریی داسەپاو و سازماندراوی کۆمەڵایەتی ، دیمەنی ئەو کێشمەکێش و خەباتە چینایەتییە کە پاش تێپەرینی دوو دەیە لە سەدەی ٢١ هێشتا هەر بەردەوامە.

لە ئێرانی ژێر دەسەڵاتی کۆماری ئیسلامیدا ستەم وهەڵاواردن،هەژاری و نادادپەروەری، رەوتی روو لە زیادبوونی جیاوازی چینایەتی، کەڵەکەبوونی سەروەت وسامان لە چنگ تاقمێکی هەرەبچووکدا،کەوتنە ژێرهێڵی هەژاری زیاتر لەسەدا٧٠ی دانیشتوان، ژیانی زۆرینەی هەرزۆری خەڵکی کردووەتە دۆزەخێکی بەردەوام و لەگەڵ مەینەتی وژان وبڕک و لەبەریەکترازانێکی ژاناوی بەرەوروو کردوەتەوە. کۆماری ئیسلامی رۆژلەگەڵ رۆژ زیاتر لە بازنەی تاقمێک تاڵانچی و دزوجەردە وجینایەتکار ومرۆڤکووژدا بەرتەسک دەبێتەوە کە لەرێگای بەدەستەوەگرتنی هەموو ئامرازەکانی سەرکوت وداپڵۆسین و جینایەت درێژە بە دەسەڵاتی دەدا.

لەچەند ساڵی رابردوودا بێجگە لە گەلێک شۆرش و راپەرینی گەورە و بەرینی کۆمەڵایەتی، هەزاران مانگرتنی گەورەی کرێکاری و بەهەزاران کۆروکۆبوونەوەی چین وتوێژی کرێکاران وبێ بەشان، بە دانپێدانانی خودی دەسەڵاتداران و کاربەدەستانی رژیم ، حکوومەتی کۆماری ئیسلامیان هەتا لێواری رووخان بردووە. بێکاری و وەستانەوەی کرێکاران وزەحمەتکێشان، مامۆستایان وخانەنشینان، کارمەندەکانی تەندروستی و بەشی دەرمان، خوێندکاران و جوتیاران بەرامبەر بە کۆماری ئیسلامی، ئەو ماکی چەوساندنەوە و نادادپەروەری و سەرچاوەی نەهامەتی و فەوتاندنی ژیانی کۆمەڵگایەکی ٨٠ ملیۆن کەسی، هەر رۆژ و هەر ساڵێک پانتاییەکی زیاتری داگرتووە.

کۆماری ئیسلامی بەکەڵک وەرگرتن لە دامودەزگا سەرکوتگەر وتۆقێنەرەکانی بۆ بە بارمتەگرتنی دەیان ملیۆن کەس و بە خەرجکردنی پارە وسامانی خەیاڵی بۆ پرچەککردنی تاقم و گرووپە چەکدارەکانی نزیک لەخۆی لە وڵاتانی رۆژهەڵاتی ناوەراست، رۆژلەگەڵ رۆژ ژیان و چارەنووسی خەڵکی ئێران  بەرەو بارودۆخێکی دژوار ونامرۆڤانە ونابەرابەرییەکی کەم وێنەی چینایەتی و ستەم وسەرکوتگەری دەبات.

سەرەرای هەموو ئەوانە کۆمەڵگای ژێردەسەڵاتی کۆماری ئیسلامی کە لەبواری سەرکوتگەری و درندەیی ناو و ناوبانگی جیهانی دەرکردووە، کۆمەڵگایەکی توورە وشێواو، کۆمەڵگایەکی راپەریو وسەرکێش وپەنگخواردووی ئەو نەفرەت وقینەیە کە ئەو رژیمە هەموو رۆژێ دڵۆپ دڵۆپ و بە شێنیەیی پیی چەشتووە. ئێرانی ئیسلامی نەک لە یەمەن و عێراق و لوبنان، بەڵکوو لە نێوخۆی کۆمەڵگای ژێردەسەڵاتی خۆیدا و لە رێگای خەباتی بەردەوام وبەرینی کریکاران وخەڵکی ئازادیخوازەوە تێکدەرووخێ.

لە کوردستانیش دەسەڵاتی کۆماری ئیسلامی بەرهەمی  چل ساڵ سەرکوت وداگیرکارییە کە بە سەدان هەزار پاسدار و چەکداری سپا وئەرتەش و ئیتلاعات و لیباس شەخسی و دامودەزگای شاراوە وئاشکرای سەرکوت گەمارۆی داوە. شەری چل ساڵەی کۆماری ئیسلامی لەدژی گەلی کورد تەنیا دامەزراندنی هەزاران مۆڵگە، پۆشتەوپرداخکردن و بڵاوەپێکردنی سەدان گرووهی بەناو زەربەت و کوشتاری رۆژانەی کاسبکاران وکۆڵبەران لە سنوورەکان و درێژەدان وبەردەوامبوونی ئێعدامە سیاسییەکان نییە، بەڵکوو ئەو رژیمە شەرێکی ماڵوێرانکەری  ئابووری و بەرێچوونی رۆژانەی ژیانی خەڵک بەرەوپیش دەبات ،بەجۆرێک کە بووەتە هەرەشەیەکی بەردەوام و رۆژانە بۆسەر ژیان وگوزەرانی زۆربەی خەڵکی کوردستان.

کۆماری ئیسلامی  لە کوردستان پرۆژە درێژماوەکانی هەموو دامەزراوە وناوەند و سەرچاوە ئابوورییەکان،کار وبەرهەمهێنانی بەرتەسک ولاواز و سەرەنجام  بنەبڕ کردووە. گرینگترین کانی زێری رۆژهەلاتی ناوەراست لە کوردستان هەلکەوتووە و،بەسەدان کانی جۆراجۆری تر کە پاش دەرهێنانیان راستەوخۆ بۆ دەرەوەی کوردستان رادەگوێزرێن. ناوەندەکانی کار و بەرهەمهێنان لە کوردستان یەک لەدوای یەکتر تووشی ئیفلاس دەبن و دادەخرێن و شەپۆلی بەرینی کرێکارانی کوردستان وەک کرێکاری وەرزی هەڵوەدای ناوەندە کرێکارییەکانی ناوچەکانی دەروەی کوردستان دەبن. دەرفەت و پیشەی پرداهات لە کوردستان بوونەتە پیشە مەترسیدارەکان کە بە بەهای گیان وجەستە و تێداچوونی بنەمالەکان تەواو دەبێ.

کۆماری ئیسلامی لە لایەکەوە بەسەدان هەزار کەسی تووشی کاری کرێکۆڵی و کۆڵبەری کردووە که زۆر له مێژە له کۆمەڵگا پێشکەتوەکانی مرۆڤایەتی ئاسەۆاریان نەماوە، و لە لایەکی دیکەوە و لە ریگای دامەزراوە سەرکوتگەرەکانییەوە و بە بیانوو و پاساوی هاوکاری لەگەڵ “زیدی ئینقلاب” رۆژانە خەریکی کوشتار و خوڵقاندنی جینایەتە. لە راستیدا کۆماری ئیسلامی بێجگە لە دابینکردنی تێچووی دامودەزگا سەرکوتگەرەکانی لە کوردستان وترخانکردنی پارە وئیمکانات بۆ راگرتنی دەسەڵاتەکەی، کوردستان بە بەشێک لە خۆی نازانێ و وایان داناوە درەنگ یان زوو دەبێ کوردستان بەجێ بهێڵێ.

بازنەی بەشمەینەتان و چەوساوەکانی کار لە کوردستان بەردەوام روو لە فراوان بوونەوەیە و تویژی مووچەخۆران، چینی کرێکارانی زەحمەتکێش ورێژەی بێبەشترین  چین وتوێژەکان بەردەوام روو لە هەڵکشانە و وردەوردە کرێکاری دایمی روو لە کەمبوونەوەن. بێکاربوونی بەشێک لە ساڵی کاسبکار وبەخێوکەری بنەماڵەکان خەریکە دەبێتە دیاردەیەکی ئاسایی و بە ملیۆن بنەمالە لەگەڵ سفرە بەتاڵ راهاتوون. هیچ سەرمایەیەک لە کوردستان ناخرێتەگەر و،گەڵاڵە وپرۆژەی بەرهەمهێنانی بنەرەتی و ژێرخانی لە کوردستان خەتی سوورە وئەوانش کە هەتا ئیستا هەن بەرەو کەمبوونەوە و نەمان دەچن.

رێزدەگرین لە ئەوەڵی مانگی مەی.لە سەدوسی (١٣٠) ساڵی رابردوودا ئەو خەباتە چینایەتییەکان، شۆرش وراپەرینی سەدان ملیۆنی کرێکاران وچەوساوەکان بووەن کە لە بوارەکانی کۆمەلایەتی، خوێندن وپێگەیاندن، کلتووری و مافەکانی کار وژیانێکی باشتردا گرینگترین و ئینسانیترین دەسکەوتەکانی مرۆڤایەتیان دەستەبەر کردووە. لە راستیدا مرۆڤایەتی و لە سەروویانەوە کرێکاران وزەحمەتکێشان بە پشت بەستن بە خەبات و کۆروکۆمەڵ ورێکخراوەکانی خۆیان لە هەڵپە ومەیلی هەوسارپساوی سەرمایەداریان بۆ هەڵلووشینی سەروەت وسامان کەم کردووەتەوە.

ئێستا و لەگەڵ تێپەرینی دوو دەیە لە سەدەی ٢١ بۆ وەدیهێنانی کۆمەڵگایەکی دوور لە چەوسانەوە و ستەم و هەڵاواردن لە پێناو دامەزراندنی ئازادی و دادپەروەری و سوسیالیسم دا،هیچ رێگاکمان بێجگە لە درێژەدان وبەردەوامبوون لەسەر خەباتی یەکگرتووانە وسەرتاسەری نییە.

شکۆدار بێت ئەوەڵی مانگی مەی،رۆژی جیهانیی کرێکار

بژی سۆسیالیزم

کۆمەڵەی زەحمەتکێشانی کوردستان

١٠ی گوڵانی ١٤٠٠ی هەتاوی

٣٠ی ئاوریلی ٢٠٢١ی زایینی.