چەند ڕۆژ لەوەپێش ژمارەیەک سەلەفی بە چەکی سارد و گەرم دەیانھەوێ لاوێکی دارسەیرانی بکوژن و بە توندی برینداری دەکەن. تا ئێستا ھیچکام لەو تاوانبارانە نە دەستبەسەرکراون و نە لێپێچینەوەیان لێکراوە. ئەو ڕووداوە بە ھۆی چەندین دیاردەی دیکەی لەو چەشنە لە مەریوان ڕق و توڕەیی خەڵکی لێکەوتەوە و دەستیان دایە ناڕەزایەتی. چەند جاری دیکەش چ لەسەر سنووری باشماخ و پتر لە ساڵێک لەمەوبەر ئەو ڕەوتە توندئاژوە سەلەفییە بە چەک ھێرشیان کردۆتە سەر خەڵک و تەنانەت لە سەیرانگاکان ئازاری کچان و ژنانیان داوە و لە چەشنی داعش سیاسەتی ترس و تۆقاندن بەکار دێنن.

ھێزەکانی کۆماری ئیسلامی ھەم بەرانبەر بە تاوانی سەلەفیە میلەو داعشەکان بێدەنگن، ھەم ھەر دەرفەتێک دەقۆزنەوە بۆ سازدانی کێشە و شەڕ لە نێو خەڵکی مەریوان. دوێنێش بە ھێزێکی زۆر گەڕەکی دارسەیرانی مەریوانیان گەمارۆ دا و ھەموو شاریشیان میلیتاریزە کرد تا ڕێگا بۆ تەراتێنی سەلەفیە ئاژاوەگێڕەکان خۆش بکەن. ئەو جۆرە ڕەفتارەی ھێزی رژیم چ لە مەریوان و چ لە جوانڕۆ لەم ساڵانەدا بەرچاو بوە و بۆ خەڵک ئاشنایە و بۆ تێکدانی ئاسایش و ئارامی خەڵکی شارەکان و دەست ئاواڵەکردنی سەلەفیەکانە و لە ڕاستیدا پیلانی ھاوبەشی پێکەوەیانە.

ئێمە داوا لە خەڵکی دارسەیران دەکەین ھێمنی خۆیان بپارێزن و نەکەونە داوی پیلانەکەی رژیم، لە ھەمان کاتدا بە شێوەی مەدەنی ناڕەزایەتی خۆیان ڕابگەیەنن. داوا لە خەڵکی مەریوان و بازار و ڕوناکبیران و کەسایەتییە خاوەن پێگەکانی شار دەکەین پشتی خەڵکی دارسەیران بگرن و دژ بەو ھێرشانە بۆ سەریان بوەستن. ناڕەزایی ھەموو شار بە کاربەدەستانی رژیم بگەیەنن و کار بکەن بۆ ئەوەی دەستی سەلەفی و پیلانگێڕییان کورت بکرێتەوە.

ئێمە بە ھەموو کۆنەپەرەستان و ڕەوتی سەلەفی ڕادەگەیەنین کە شۆڕشی کوردستان و بزووتنەوەی جەماوەری شار چیتر ئەو جۆرە کردەوە قیزەونانەیان لێ قبوڵ ناکات. داوایان لێدەکەین نەبنە ھاوپەیمان و جێبەجێکەری پیلانەکانی ڕژیم و ئاسایشی شارۆمەندان تێک نەدەن و لە بەڕەی خۆیان زیاتر پێ دانەکێشن. دڵنیاین لە درێژەی ئەو کردەوانەیاندا دەکەونە بەر ڕق و توڕەیی ھەموو خەڵکی کوردستان. کۆمەڵانی تێکۆشەری خەڵک چیتر ئەو ھەموو تەجاوز و پیلانە دژ بە خۆیان قبوڵ ناکەن و کۆمەڵە و هەڵسوڕاوانی سیاسی و مەدەنی وەک هەمیشە بۆ پتەوترکردنی یەکریزی و له ریزی پێشەوە جەماوەر پاشەکشە بەو خەونە ئاڵوزانە دەکەن که له سێبەری کۆماری ئیسلامی خۆیان حەشار داوە.
داوا لە ھەموو خەڵکی شار و دێھاتەکانی کوردستان دەکەین دژ بەو پیلانانەی حکوومەتی ئیسلامی و سەلەفیەکان ناڕەزایەتی دەرببڕن و بە ھەر جۆرێک بۆیان دەکرێ لە خەڵکی مەریوان و دارسەیران پشتیوانی بکەن.

کۆمەڵەی زەحمەتکێشانی کوردستان
۱۳ی گوڵانی ۱٤٠٠