پاشنیوەرۆی ١٧ی خەزەڵوەر ١٣٩٩ – ٧ی نۆڤامبری ٢٠٢٠ وەفدێکی پەیوەندییەکانی پارتی ئازادی کوردستان سەردانی مقەڕی پەیوەندییەکانی کۆمەڵەی زەحمەتکێشانی کوردستان لەشاری سلێمانی کرد.
وەفدی میوان کە پێکھاتبون لە ھەریەک لە بەڕێزان: زانا نیکدڵ و جوامشێر رەفعەتی ئەندامانی نوێنەرایەتی پارتی ئازادی کوردستان لە پارێزگای سلێمانی لە لایەن ھاوڕێ عەتا ناسرسەقزی بەرپرسی پەیوەندییەکانی کۆمەڵەی زەحمەتکێشانی کوردستان لە سلێمانی پێشوازییان لێکرا.
لە دیدارەکەدا قسەو باسێک لەسەر رووداوەکان و بارودۆخی ناوچەکەو ئەو مەترسی و درەفەتانە کرا کە لەبەردەم بزوتنەوەی کورددا بوونیان ھەیە و ھەردوولا پێیانوابوو یەکگرتوویی و ھاوئاھەنگی ھێزە کوردییەکان دەتوانێت پارێزەری بزوتنەوەکەی بێت لەبەرامبەر پیلانەکانی دوژمنان.
قسەو باسێک لەسەر ھەڵبژاردنەکانی سەرۆکایەتی ئەمریکا و ئەگەری گۆڕان لەسیاسەتی دەرەوەی ئەمریکا بەرامبەر بە کورد و بەتایبەت ئێران لە پاش راگەیاندنی ئەنجامی ھەڵبژاردنەکان تەوەرێکی دیکەی کۆبوونەوەکە بوو.
لەکۆتایی کۆبوونەوەکەدا ھەردوولا جەختیان لەسەر بەردەوامی کۆبوونەوەکانی نێوانیان کردەوە.
