بە پێی هەواڵی گەیشتوو بەداخەوە کاتژمێر ۱۰ی شەوی رابردوو ۱۲ی مانگی سەرماوەز کاک مەولوودی شەریف ئازەر ناسراو بە مەمولوودی سۆفی رەحمان خەڵکی ئاوایی ئاتابڵاغی، لە شاری مهاباد و لە تەمەنی ٨٦ ساڵیدا بە هۆی نەخۆشی بۆ هەمیشە دڵەگەورەکەی لە لێدان کەوت. کاک مەموولود کە بە هۆی بەشداریی بەشێک لە ئەندامانی بنەماڵەکەی لە خەباتی رزگاریخوازی گەلی کورددا تووشی گەلێک ئازار و چەرمەسەری هاتبوو،بەڵام بەردەوام بە ورە و بە هیوای گەشی بەدوارۆژ پاڵپشتی رۆڵەکانی و خەباتی رزگاریخوازی کوردستان بوو. کاک مەمولوود بە هۆی رووخۆشی و سیمای سەمیمانە و دڵسۆزانەی خۆشەویستی پێشمەرگەکانی کۆمەڵە بوو. هەرچەند کاک مەمولوود بەهۆی دوورەوڵاتبوونی کوران و کچانی و هەمیش لەئاکامی گوشار و ئازارەکانی دامودەزگا سەرکووتگەرەکانی رژیم،باری ژیان و گوزەرانی تووشی ئاستەنگ و گرفت هاتبوو،بەڵام بۆ ساتێکیش ورەی بەرنەداو هیوابڕاو نەبوو،هەر بۆیە هەتا دواساتەکانی ژیانی وەک کەسایەتییەکی نیشتمانپەروەر و بەوەفا و دڵسۆز لە نێو هەموو ئەو کەسانەی کە دوورونزیک دەیانناسی و بەتایبەت لە نێو خەڵکی ناوچەکانی شامات و محاڵی مهاباد خۆشەویست و جێگای رێز و متمانە بوو. هەرچەند کاک مەلوود بەرلە وەدیهاتنی خۆزگە و ئاواتی بە سەربەستی و شادبوونەوەی بە دیداری ئازیزانی دوورەوڵاتی بۆ هەمیشە چاوەکانی لێکنا،بەڵام دڵنیاین کە وەک هەزاران باوکی تێکۆشەرو خەباتکاری ئەم کوردستانە یاد و ناوی بۆ هەمیشە لە دڵی ئەویندارانی ئازادیدا بە زیندوویی دەمێنێتەوە. ئێمە بە بۆنەی مەرگی کاک مەمولوودی شەریف ئازەر لە لایەن هەموو ریزەکانی کۆمەڵەوە پربەدڵ سەرەخۆشی لە بنەماڵەی خۆراگر و سەربەرزی و بە تایبەت سەرەخۆشی لە هاورێیان سەعید و سەعدوون و ئارەزوو و میناخانم دەکەین و خۆمان بەشەریکی غەم و پەژارەیان دەزانین. یادی ئازیزی کاک مەولوودی شەریف ئازەر بەرز و بەرێز بێ.
کۆمەڵەی زەحمەتکێشانی کوردستان
۱۳ی سەرماوەزی ۱۳۹۹ی هەتاوی ۳ی دسامبری ۲۰۲۰ی زایینی
