بەپێی سەرچاوەکانی هەواڵ بەداخەوە بەکرێگیراوانی بەناو سنوورپارێزی سپای پاسداران، ڕۆژی دووشەممە ٤ی ڕەشەمەی ٩٩ی هەتاوی، لە ناوچەی سنووری “بۆمپەشت”ی، سەراوان، تەقەیان لە کاسبکارانی بەلووچ کرد و لە ئاکامی تەقەی ئەو هێزانەدا ١٠ کەس کوژران و بە دەیان کەسیش بریندار بوون.
ئەوە یەکەمجار نییە بەکرێگیراوانی کۆماری ئیسلامیی ئێران، لەو جۆرە جینایەتانە دەکەن و ئێمە ڕۆژانە دەبینین کە لە ئاکامی جینایەتەکانی ڕێژیم لە کوردستان و کوشتاری کۆڵبەران و باقیی نەتەوەکانی دیکەی ئێران لە ناوچەکانی ئەو وڵاتە، کە بووەتە کاری هەموو ڕۆژێکی دەست و پێوەندییەکانی ئەو ڕێژیمە.
دۆخی تاڵ و ناخۆشی ناوچە و نەبوونی هەلی کار و سنووردارکردنەکان بۆ نەتەوە ژێردەست و زوڵم لێکراوەکانی ئێران بووەتە هۆی ئەوەی کە خەڵک هیچ دەرەتانێکیان نەبێ و بۆ بژێوی ژیانی ڕۆژانەیان ڕوو بکەنە سەر سنوورەکان و بۆ دابینکردنی نانی شەو گیانی خۆیان دەخەنە مەترسییەوە.
ناوەندی هاوکاریی حیزبەکانی کوردستانی ئێران، وێڕای مەحکوم کردنی ئەو جەنایەتە دژە مرۆڤییە، سەرەخۆشیی خۆی ئاراستەی بنەماڵەی قوربانیان و هیوای سڵامەتی بۆ برینداران، لەو باوەڕەدایە کە هۆکاری سەرەکیی هەمووی ئەو جینایەت و وێرانکارییانە، ڕێژیمی کۆماری ئیسلامیی ئێرانە و لەنێوبردنی ئەو ڕێژیمە تەنیا ڕێگایەکە کە لە پێش خەڵکی ئێراندایە.

ناوەندی هاوکاریی حیزبەکانی کوردستانی ئێران
٤ی ڕەشەمەی ٩٩ی هەتاوی
٢٣ی فێورییەی ٢٠٢١ی زایینی

بابەتی پێشووباوکی هاورێیەکی گیانبەختکردووی کۆمەڵە لە ناوچەی چۆمی مەجیدخان ماڵئاوایی لە ژیانکرد
بابەتی دواترکردەوەی جینایەتکارانەی هێزە چەکدارەکانی سپاى پاسداران لە بەلووچستان کە تێیدا زیاتر لە ٦٠ کاسبکار خەڵتانی خوێن کراون،مەحکووم دەکەین.