بە پێی ئەو هەواڵانەی کە بە ناوەندی راگەیاندنی کۆمەڵە گەیشتووە،ئێوارەی دوێنێ چوارشەممە ٦ی مانگی رەشەمەی ١٣٩٩ی هەتاوی هێزە سەرکوتگەرەکانی رژیمی کۆماری ئیسلامی لە سەر رێگای نێوان ئاواییەکانی “شیناوێ” و “زێدان”ی ناوچەی پیرانشار ئۆتۆمبیلێکی مەدەنی دەدەنە بەر دەسترێژی گوللە و لە ئاکامدا بە داخەوە دوو کەس کە سەرنشینی ئۆتۆمبێلەکە و برای یەکتر بوون، دەست بەجێ گیانیان لەدەست دەدەن.
شایانی باسە ئەو جینایەتەی هێزە چەکدارەکانی رژیم لە کاتێکدا رووی داوە کە سەرەرای کوشتاری بەردەوام ورۆژانەی کاسبکاران و کۆڵبەران لە ناوچە سنوورییەکانی کوردستان،لە چەند رۆژی رابردوودا بە هۆی دەسترێژ و تەقەی هێزەکانی سپای پاسداران لە بەلووچستان ١٠ کاسبکار گیانیان لەدەست داوە.هاوپشتیی خەڵکی کوردستان لەگەڵ خەڵکی بەلووچستان و نیگەرانی دەسەڵاتدارانی حکوومەتی ئیسلامی لە پەرەسەندن و بەرین بوونەوەی نارەزایەتییە جەماوەرییەکان بوونە هۆکاری ئەوەیکە پاش گیانلەدەستدانی ئەو دوو برا کوردە، وەزارەتی ئیتلاعاتی رژیمی ئیسلامی لە راگەیاندنێکی بەپەلە و چەواشەکارانەدا رابگەیەنێ کە دوو کەسیان بە تاوانی هەوڵدان بۆ ئەنجامدانی کردەوەی تێرۆریستی لە ناوچەی پیرانشار کوشتووە.
جێگای ئاماژەیە کە تەرمی ئەو دوو برایە بە ناوەکانی “عەبدووڵڵا و عوسمان نادری” کوری مارف براونەتەوە بۆ شاری پیرانشار.
لە لایەکی دیکەوە هێزە ئەمنییەتییەکانی رژیم پاش ئەم کردەوە جینایەتکارانەیە،ئەندامانی ئەو بنەماڵەیەیان دەستبەسەر کردووە.
