لەم ڕۆژانەدا بە ملیۆنان مرۆڤ لە سەرتاسەری جیهان شاهیدی ڕووداوگەلێكی كارەستابارن كە بەسەر خەڵكی ئەفغانستان، بە تایبەتی بەسەر ژنان‌ و كچانی ئەو وڵاتەدا دێت.
لە چەند ڕۆژی ڕابردوودا بزوتنەوەی تاڵیبان كۆنتڕۆڵی زۆربەی ناوچەكانی ئەفغانستانی بە دەستەوە گرت‌ و سەرۆك كۆماری ئەفغانستان بەپەلە وڵاتی بۆ بزوتنەوەی توندڕەوی تاڵیبان جێهێشت.

بە گرتنی هەر شار‌و شارۆچكەیەك ئەم گروپە توندڕەوە ئیسلامییە دەستیان كردوە بە كوشتن و ئازاردانی خەڵک، بە تایبەت كچان‌ و ژنان.
بە پێی زانیارییەكان چەكدارانی تاڵیبان منداڵانی كچ دەڕفێنن و لە خۆیانی مارە دەکەن وماڵ بەماڵ بۆ نیکاح دەگەڕێن.
ژمارەیەک لە ژنان‌ و كچانی ئەفغانی لەسەر پۆشاک و جلوبەرگ یان چاویان دەرهێنراوە یان كوژراون. ئەشكەنجە‌ و ئازاری ژنان‌ و كچانی خوێندەوار لەوانە نوسەران، دەرهێنەران‌ و شاعیران‌و… ڕۆژانە لە هەر سوچێكی وڵاتی ئەفغانستان زۆر ئاسایی بە بەرچاوی كۆمەڵگای نێودەوڵەتییەوە ڕوبەڕوی شکەنجەو کوشتن دەبنەوە و لە ترسی گیانی خۆیان لە هەوڵی ڕاکردن و دوورکەوتنەوەن لە وڵاتەکەیان.

دۆخی ژنان لە ڕۆژهەڵاتی ناوەڕاست كە بە هەبوونی هێزە توندڕەوە ئیسلامییەكان هەر لە ئێرانی ژێر دەسەڵاتی كۆماری ئیسلامی كە هاندەری سەرەكی توندڕەویی و تیرۆریزمی ئیسلامییە هەتا ئەفغانستان و عێراق‌ و توركیە‌ و پاكستان… ڕوو لە خراپیە.
بە دەسەڵات گەیشتنی هێزەكانی تاڵیبان لە ئەفغانستان دوا نمونەی ئەو ستەم‌ و ناحەقییانەیە كە ڕووبەڕووی ژنان دەبێتەوە.

ناوەندی ژنانی ڕۆژهەڵاتی كوردستان، سەرەڕای مەحكوم كردنی تاوانەكانی چەكدارانی تاڵیبان بەرامبەر بە خەڵكی ئەفغانستان ‌و بە تایبەتی بەرامبەر بە ژنان‌ و منداڵان، داوا لەسەرجەم رێكخراوە نێودەوڵەتییەكانی مافی مرۆڤ دەكات، بە هانای خەڵكی ئەفغانستانەوە بچن.
ئێمە پشتیوانی خۆمان لە مافی ڕەوای ژنانی ئەفغانستان، دەردەبڕین‌ و بڕوامان بەوەیە كە بەهێزكردنی خەباتی ژنان‌ و داخوازیی بۆ مافی یەكسانی ژن‌ و پیاو‌، مەحكوم كردنی هەرچەشنە هەڵاواردنێك دژ بە ژنان، وەدیهێنەری كۆمەڵگایەكی ئازاد‌ و یەكسانە.

ناوەندی ژنانی ڕۆژهەڵاتی كوردستان
٢٥ی گەلاوێژی ١٤٠٠ – ١٦ی ئەگۆستی ٢٠٢١

ڕێکخراوی ئاسۆی ژنی کورد
ڕێکخراوی ئافرەتانی خەباتی کوردستانی ئێران
کۆمەڵەی ژنانی ڕۆژهەڵات
یەکیەتیی ژنانی دیموکراتی کوردستان
یەکیەتیی ژنانی دیموکراتی کوردستانی ئێران

بابەتی پێشووبەشداری هاوڕێیانی کومیتەی بریتانیای کۆمەڵە لە خوپیشاندانیک بو پشتیوانی لە نارەزایتیەکانی ئەم دوایانەی خەڵکی ئێران و مەحکوومکردنی تێرۆری موسا باباخانی ئەندامی کومیتەی ناوەندی حیزبی دیمۆکراتی کوردستان
بابەتی دواترڕاگەیەندراوی ناوەندی هاوکاریی حیزبەکانی کوردستانی ئێران
بە بۆنەی سالوەگەڕی فتوای جیهادی خومەینی دژ بە گەلی کوردستان