بە داخەوە هەواڵی ماڵئاوایی لەژیانکردنی کاک محەممەد بەنیبەشەر باوکی دوو هاورێی گیانبەختکردووی کۆمەڵەمان لە شاری سنە پێگەیشت.
کاک محەممەدی بەنیبەشەر باوکی دوو هاورێی گیانبەختکردوومان،هاورێ شاخروخ ناسراو بە”دەبیر” و هاورێ شارام و،هەروەها باوکی ئازیزی هاورێی دێرین وکادری لەمێژینەی نێو ریزەکانی کۆمەڵە هاورێ نیما بەنیبەشەرە.
هاورێ شارامی بەنیبەشەر لە کاتێکدا ماوەیەکی کەم بوو کە خولی بارهێنان و پێگەیشتنی لە فێرگەی پێشمەرگایەتی کۆمەڵە تەواو کردبوو،بە داخەوە ساڵی ١٣٦٢ لە ئاوایی دۆزەغەرەی ناوچەی ساراڵی دیواندەرە لە ئاکامی شەری نێوخۆییدا گیانی ئازیزی لە پێناو ئامانجە بەرزەکانیدا بەختکرد.بەداخەوە چەند ساڵ دواتر هاورێ شارۆخی برای کە لە نێو ریزەکانی کۆمەڵەدا بە دەبیر دەناسرا،هاورێ لەگەڵ پێشمەرگەکانی گوردانی قارەمانی شوان پاش شەر وخۆراگرییەکی کەم وێنە ومێژووی لە مانگی رەشەممەی ساڵی ١٣٦٦ی هەتاویدا لە ناوچەی شارەزوور گیانی ئازیزی بەختی رێبازی پیرۆزی کرد.
کاک محەممەد کە کەسایەتییەکی خۆراگر و سیمایەکی ناسراو و جێگای متمانەی خەڵکی شاری سنە بوو،نەتەنیا گیانبەختکردنی دوو لە باشترین رۆڵەکانی ورە وهەستی سەربزێوی وخەباتکارانەی لاواز نەکرد،بەڵکوو لەگەڵ پێگەیشتنی یەکێکیتر لە رۆڵەکانی بە نێوی نیما و بە ناردنی بۆ نێو ریزەکانی کۆمەڵە لەسەر رێبازی رۆڵە گیانبەختکرووەکانی سوورتر راوەستاو و هەتا دواساتەکانی تەمەنی دڵی کەیلی خۆزگەی رزگاری وسەربەستی بوو.
زۆر بەداخەوە ئەو باوکە خەباتکار ودڵسۆزە ئێوارەی ئەمرۆ یەکشەممە٣١ی مانگی گەلاوێژی ١٤٠٠ی هەتاوی لە تەمەنی ٩٠ ساڵیدا، بۆ هەمێشە چاوەکانی لێکنا و ئێمە وئازیزانی بەجێهێشت.
ئێمە بە بۆنەی ماڵئاوایی لەژیانکردنی کاک محەممەدی بەنیبەشەر لە لایەن هەموو ریزەکانی کۆمەڵەوە پربەدڵ سەرەخۆشی لە بنەماڵەی سەربەرزی بەنیبەشەر،بە تایبەتی سەرەخۆشی خۆمان پێشکەشی کادر وتێکۆشەری لە مێژینەی ریزەکانی کۆمەڵە هاورێ نیما بەنیبەشەر و سەرجەم خەڵکی کوردستان و،بە تایبەت خەڵکی شاری سنەی قارەمان دەکەین و خۆمان بە شەریکی خەمیان دەزانین.
بژی یادی ئازیزی کاک محەممەدی بەنیبەشەر
سکرتاریەتی کۆمەڵەی زەحمەتکێشانی کوردستان
٣١ی گەلاوێژی ١٤٠٠ی هەتاوی
٢٢ی ئاگوستی ٢٠٢١ی زایینی

بابەتی پێشوویادی پێشمەرگەو ئەندامی سەرکردەایەتی حدک موسا باباخانی لە وڵاتی سوئێد بەرز راگیرا.
بابەتی دواتربەرێوە چوونی کۆبوونەوەی ناوەندی هاوکاری