ڕۆژی هەینی ڕێکەوتی ١٧ی سپتامبری ۲٠۲۱ی زایینی، خۆپێشاندان و کۆبوونەوە بە نیشانەی ناڕەزایەتی و مەحکووم‌کردنی ڕێژیمی کۆماری ئێسلامیی ئێران، لە بەردەم پاڕلمانی نۆروێژ لە شاری ئۆسڵۆ لەلایەن ناوەندی ھاوکاریی حیزبەکانی کوردستانی ئێران بەڕێوەچوو.
ڕێوڕەسمەکە بە سروودی نەتەوایەتی ” ئەی ڕەقیب” و خولەکێک بێدەنگی بۆ ڕێزگرتن لە گیانی پاکی شەهیدانی ڕێگای ئازادی کورد و کوردستان دەستیپێکرد.
پاشان لەلایەن بەرێزان ” ئیبراهیم کۆنەپۆشی” و” بەفرین رۆستەمی” بە هەر دوو زمانی کوردی و نۆروێژی بەخێرهاتنی بەشداران کرا و چەندین دروشمی کوردی و نۆروێژی و فارسی بۆ پشتیوانی لە هێزەکانی رۆژهەڵاتی کوردستان و دژی رێژیمی کۆماری ئیسلامی ئێران لە لایەن بەرێوەبەران و بەشدارانی خۆپێشاندان گوترانەوە.
دواتر  پەیامی ناوەندی هاوکاری حیزبەکانی کوردستانی ئێران بە کوردی لە لایەن ” خوسرەو قادری” و بە نۆرویژی لە لایەن ” موژدە چاوشینی” خوێندرایەوە.

لە پەیامی ناوەندی هاوکاری دا هاتبوو:” دیارە ئەوە یەکەم جار نییە کە کۆماری ئیسلامیی ئێران بە بەزاندنی سنوور و پێشێلکردنی سەروەریی وڵاتانی دراوسێ، هەڕەشە لە گیان و ماڵ و سامانی خەڵکی مەدەنی و نانەوەی ئاژاوە و بشێوی لە ناوچەکەدا دەکات و ئەو ڕێژیمە بە خولقاندنی کارەسات و کوشتن و تێرۆر و تاوان دژ بە مرۆڤایەتی خووی گرتووە و شوناسی خۆی لەگەڵ قەیران و ناسەقامگیری گرێ داوە.”

 لە بەشێکی دیکەی پەیامی ناوەندی هاوکاری حیزبەکانی کوردستانی ئێران وێرای ئاماژە بە قەیرانەکانی ناوخۆیی رێژیمی ئاخوندی ئێران دا هاتبوو:
” کۆماری ئیسلامی لە نێوخۆی وڵاتدا تووشی دەیان قەیرانی چارهەڵنەگر بووە و لە ماوەی تەمەنیدا وا ڕاهاتووە کە بۆ خۆدزینەوە لە چارەسەریی قەیرانێک، قەیرانێکی دیکە بخولقێنێت. هەربۆیە ئەمجارەش بە کەڵکاژۆ وەرگرتن لە دۆخی سیاسیی ناوچەکە و دانبەخۆداگرتنی کۆمەڵگای نێودەوڵەتی لە هەمبەر تاوان و دەستدرێژییەکانی، پێی وایە بە چاوسوورکردنەوە لە خەڵکی مەدەنی و هەڕەشە لە ماڵ و حاڵی پەنابەرانی سیاسی، دەتوانێ کاریگەری لەسەر ئیرادەی سیاسیی نەتەوەی کورد و ڕێکخراوە خەباتکارەکانی دابنێت و بە ئامانجە گڵاوەکانی خۆی بگات.”

لە کۆتایی پەیامی ناوەندی هاوکاری دا وێرای مەحکوم کردنی ئەو هەڕەشە و هێرشانەی رێژیمی ئێران، داوای لە بیروڕای گشتیی خەڵکی کوردستان، ئازادیخوازان، هێز و لایەنە سیاسییەکانی کورد لە هەر چوار پارچەی کوردستان، حکوومەتی هەرێمی کوردستان و عێراق و کومەڵگای نێودەوڵەتی دەکات سنوورێک بۆ زیادەڕۆییەکانی ئەو ڕێژیمە دابنێن و بە هەڵوێست و کردەوەی خۆیان، لە بەرانبەر ئەو هەوڵە تێکدەرانەیەی ڕێژیمی ئێراندا بوەستنەوە.


جێگای ئاماژەیە کە بە سەدان ئەندامی حیزبە کوردستانییەکان، کەسایەتییە سیاسییەکان و کوردانی دانیشتووی نۆروێژ بەشداری ئەو خۆپیشاندانە بوون و بۆ مەحکووم‌کردنی هێرش و تۆپبارانی بنکە و بارەگاکانی لایەنە سیاسییەکانی ڕۆژهەڵاتی کوردستان دەنگیان خستە پاڵ دەنگی هێزەکانی خەباتکاری کوردستان. هەروەها پەیامی ناوەندی هاوکاری حیزبەکانی کوردستانی ئێران بە زمانی نۆروێژی لە سەر شەقام و خەڵکی نۆروێژی بڵاوکرایەوە کە دەگەڵ پێشوازی خەڵکی بیانی بەرەوروو بوو.
شایانی باسە کە خۆپیشاندانەکە بە چەندین سروودی شۆڕشگێڕی لە لایەن هونەرمەند ” شێرکۆ مەریوانی” و دروشم بە زمانی نۆروێژی، فارسی و کوردی پاش دوو کاتژمێر کۆتایی پێهات.

بابەتی پێشووبه ڕێوەچوونی خۆپێشاندانێک لە وڵاتی فینلاند لە سەر بانگە وازی ناوەندی هاوکاری حیزبەکانی کوردستانی ئێران
بابەتی دواتربەرێوەچوونی کۆبوونەوەی ناوەندی هاوکاری حیزبەکانی کوردستانی ئێران.