پەیامی هاوخەمیی کۆمەڵە بە بۆنەی ماڵئاوایی لەژیانکردنی مامۆستا مەلا محەممەدی غەفووری تێکۆشەری دێرین وکەسایەتی ناسراو و ئازادیخوازی ناوچەی سەقز.

زۆر بەداخەوە ئاگادار بووین کە دوێنێ دووشەممە ١٠ی مانگی خەزەڵوەری ١٤٠٠ی هەتاوی مامۆستا مەلا محەممەدی غەفووری کەسایەتی ناسراو و سیمای خۆشەویستی خەڵکی کوردستان بە هۆی نەخۆشی لە نەخۆشخانەی شاری سەقز بۆ هەمیشە دڵە گەورە و پر لە خۆشەویستی بۆ ئازادی و سەربەستی لە لێدان کەوتووە.
مامۆستا مەلا محەممەد کە خەڵکی شارۆچکەی” ساحێب”ی ناوچەی سەقز بوو،لەو مامۆستا و کەسایەتییانە بوو کە هەر لە پێش راپەرینی گەلانی ئێران لە دژی رژیمی پاشایەتی دەنگێکی رەسا و بوێر بوو بەرامبەر بە زۆڵم و بێدادی.مامۆستا مەلا محەممەد کە دواتر لەئەندامانی دەفتەری مامۆستا شێخ عێزەدینی حوسەینی بوو،بەردەوام لە دژی خورافە و کۆنەپەرستیی باو دەوەستایەوە و وەک خەباتکارێکی ئازادیخواز و پێشکەوتنخواز پێوەندییەکی تووند وتۆڵ و قایمی لە گەڵ تێکۆشەرانی چەپ وئازادیخواز و هەڵسووراوانی کۆمەڵە لە شاری سەقز و ناوچەکە بوو.بە تایبەت لەگەڵ هاورێیان کاک حەمەحوسەینی کەریمی و کاک یەحیای خاتوونی و ژمارەیەکی بەرچاو لە تێکۆشەران و رووناکبیرانی شاری سەقز و دێهاتەکانی دەوروبەر لە پێوەندییەکی خەباتکارانە و نزیک دابوو. لەگەڵ دەستپێکردنی خۆپیشاندانەکان لە دژی رژیمی پەهلەوی و خرۆشی جەماوەری لە کوردستان،مامۆستا لە بەرەی لاوانی خەباتکار ولە ریزی ئازادیخوازاندا مایەوە و پاش رووخانی رژیمی پەهەلەوی و هاتنەسەرکاری کۆماری ئیسلامی و هێرش بۆسەر کوردستان،مامۆستا مەلا محەممەدی غەفووری وەک تێکۆشەرێکی ئازادیخواز بۆ پاراستنی دەسکەوتەکانی خەڵکی کورد چەکی پێشمەرگایەتی کردە شان و ماوەیەکی زۆر لە دەفتەری مامۆستا شێخ عێزەدین درێژەی بە خەبات دا.دواتر گەرایەوە سەر ژیانی ئاسایی و لە زێدی خۆی”ساحێب” و لە شاری سەقز ژیانی بردەسەر.
مامۆستا مەلا محەممەدی غەفووری کە کەسایەتییەکی قسەخۆش و مەجلیس گەرم و سەمیمی بوو،هەتا دوا ساتەکانی تەمەنی وەک دۆستێکی نزیکی کۆمەڵە و وەک کاسایەتییەکی خەباتکار و لایەنگری ئازادی و پێشکەوتنخوازی مایەوە و،هەر بەم هۆیەش لە نێو خەڵکی کوردستان بە گشتی و شار و دێهاتەکانی ناوچەی سەقز بە تایبەتی خۆشەویست و جێگای باوەر و متمانەی خەڵک بوو.
زۆر بەداخەوە ئەم کەسایەتییە خەباتکارە و ئەم تێکۆشەرە دێرینەی کوردستان دوێنێ دووشەممە بە هۆی نەخۆشی لە نەخۆشخانەی شاری سەقز بۆ هەمیشە بە جێی هێشتین.
ئێمە بە بۆنەی ماڵئاوایی لەژیانکردنی خەباتکاری دێرین و دۆست ولایەنگری بەوەفای کۆمەڵە مامۆستا مەلا محەممەدی غەفووری،لە لایەن هەموو ریزەکانی کۆمەڵەوە پر بەدڵ سەرەخۆشی لە بنەماڵە وکەسوکاری مامۆستا،بە تایبەت سەرەخۆشی لە کاک “وریا”ی کوری و خەڵکی شارۆچکەی ساحێب و شاری سەقز بە تایبەتی و هەموو خەڵکی کوردستان بە گشتی دەکەین.
یادی مامۆستا مەلا محەممەدی غەفووری بەرز وبەرێز بێت
سکرتاریەتی کۆمەڵەی زەحمەتکێشانی کوردستان
١١ی خەزەڵوەری ١٤٠٠ی هەتاوی
٢ی نوامبری ٢٠٢١ی زایینی.